നാളെയാണ് അവസാന ദിവസം; ഈ അവസരങ്ങൾ മിസ്സാക്കല്ലേ

1.കൊച്ചിൻ ഷിപ്പ്‌യാർഡിൽ അവസരം: സ്രാങ്ക്, എഞ്ചിൻ ഡ്രൈവർ തസ്തികകളിലേക്ക് അപേക്ഷിക്കാം

കൊച്ചിൻ ഷിപ്പ്‌യാർഡ് ലിമിറ്റഡിൽ (CSL) ജോലി ആഗ്രഹിക്കുന്നവർക്ക് സുവർണ്ണാവസരം. ബോട്ട് ക്രൂ വിഭാഗത്തിൽ സ്രാങ്ക് (Serang), എഞ്ചിൻ ഡ്രൈവർ (Engine Driver) എന്നീ തസ്തികകളിലേക്ക് യോഗ്യരായ ഉദ്യോഗാർത്ഥികളിൽ നിന്നും ഓൺലൈനായി അപേക്ഷ ക്ഷണിച്ചു.

ഒഴിവുകളും യോഗ്യതകളും

ആകെ 8 ഒഴിവുകളാണ് ഈ തസ്തികകളിലായി റിപ്പോർട്ട് ചെയ്തിരിക്കുന്നത്. രണ്ട് തസ്തികകൾക്കും അടിസ്ഥാന വിദ്യാഭ്യാസ യോഗ്യത ഏഴാം ക്ലാസ് വിജയിച്ചിരിക്കുക എന്നതാണ്. എന്നാൽ ബന്ധപ്പെട്ട മേഖലയിലെ പ്രവൃത്തിപരിചയവും സർട്ടിഫിക്കറ്റുകളും നിർബന്ധമാണ്.

1. സ്രാങ്ക് (6 ഒഴിവുകൾ):

• വിദ്യാഭ്യാസ യോഗ്യത: ഏഴാം ക്ലാസ് പാസായിരിക്കണം.
• സർട്ടിഫിക്കറ്റ്: ഇൻലാൻഡ് വെസൽസ് ആക്ട്, 2021 പ്രകാരം അംഗീകൃത അതോറിറ്റി നൽകുന്ന ‘സ്രാങ്ക്’ (Serang) അല്ലെങ്കിൽ ‘ലാസ്കർ കം സ്രാങ്ക്’ (Lascar cum Serang) സർട്ടിഫിക്കറ്റ് ഉണ്ടായിരിക്കണം.
• പ്രവൃത്തിപരിചയം: മോട്ടോർ ബോട്ടിൽ കുറഞ്ഞത് ഒരു വർഷത്തെ പ്രവൃത്തിപരിചയം നിർബന്ധമാണ്.

2. എഞ്ചിൻ ഡ്രൈവർ (2 ഒഴിവുകൾ):

• വിദ്യാഭ്യാസ യോഗ്യത: ഏഴാം ക്ലാസ് പാസായിരിക്കണം.
• സർട്ടിഫിക്കറ്റ്: ഇൻലാൻഡ് വെസൽസ് ആക്ട്, 2021 പ്രകാരമുള്ള എഞ്ചിൻ ഡ്രൈവർ സർട്ടിഫിക്കറ്റ് ഉണ്ടായിരിക്കണം.
• പ്രവൃത്തിപരിചയം: മോട്ടോർ ബോട്ടിൽ കുറഞ്ഞത് ഒരു വർഷത്തെ എഞ്ചിൻ ഡ്രൈവർ ആയിട്ടുള്ള പ്രവൃത്തിപരിചയം ഉണ്ടായിരിക്കണം.

പ്രായപരിധി

2026 ജൂലൈ 22-ലെ കണക്കുപ്രകാരം അപേക്ഷകരുടെ പ്രായം 45 വയസ്സിൽ താഴെയായിരിക്കണം. ഒബിസി (നോൺ-ക്രീമി ലെയർ) വിഭാഗത്തിലുള്ളവർക്ക് സർക്കാർ നിയമങ്ങൾ പ്രകാരം 3 വർഷത്തെ പ്രായ ഇളവ് ലഭിക്കുന്നതാണ്.

അപേക്ഷിക്കേണ്ട വിധം

താല്പര്യമുള്ള ഉദ്യോഗാർത്ഥികൾ ജൂലൈ 22, 2026-ന് മുമ്പായി കൊച്ചിൻ ഷിപ്പ്‌യാർഡിന്റെ ഔദ്യോഗിക വെബ്സൈറ്റ് വഴി ഓൺലൈനായി അപേക്ഷ സമർപ്പിക്കേണ്ടതാണ്. വിശദമായ വിവരങ്ങൾക്കും വിജ്ഞാപനത്തിനും www.cochinshipyard.in എന്ന വെബ്സൈറ്റ് സന്ദർശിക്കുക.

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

2.കൊച്ചിൻ ഷിപ്പ്‌യാർഡിൽ ജോലി നേടാം: ഓട്ടോ ഇലക്ട്രീഷ്യൻ തസ്തികയിലേക്ക് ഇപ്പോൾ അപേക്ഷിക്കാം

കപ്പൽ നിർമ്മാണ മേഖലയിൽ പ്രവർത്തിക്കാൻ ആഗ്രഹിക്കുന്ന ഐ.ടി.ഐ ബിരുദധാരികൾക്ക് സുവർണാവസരം. കൊച്ചിൻ ഷിപ്പ്‌യാർഡ് ലിമിറ്റഡ് (CSL) ഓട്ടോ ഇലക്ട്രീഷ്യൻ തസ്തികയിലേക്ക് യോഗ്യരായ ഉദ്യോഗാർത്ഥികളിൽ നിന്നും അപേക്ഷ ക്ഷണിക്കുന്നു. കരാർ അടിസ്ഥാനത്തിലുള്ള ഈ നിയമനത്തിലേക്ക് 2026 ജൂലൈ 22 വരെ ഓൺലൈനായി അപേക്ഷ സമർപ്പിക്കാവുന്നതാണ്.

ഈ തൊഴിലവസരത്തെക്കുറിച്ചുള്ള സമ്പൂർണ്ണ വിവരങ്ങൾ താഴെ നൽകുന്നു:

തസ്തികയും ഒഴിവുകളും

• തസ്തികയുടെ പേര്: ഓട്ടോ ഇലക്ട്രീഷ്യൻ
• ആകെ ഒഴിവുകൾ: 2

അക്കാദമിക് യോഗ്യതയും മറ്റ് നിബന്ധനകളും

ഈ തസ്തികയിലേക്ക് അപേക്ഷിക്കുന്നവർക്ക് താഴെ പറയുന്ന യോഗ്യതകൾ ഉണ്ടായിരിക്കണം:

1. അക്കാദമിക് യോഗ്യത: എസ്.എസ്.എൽ.സി (10-ാം ക്ലാസ്) പാസായിരിക്കണം.
2. സാങ്കേതിക യോഗ്യത: മെക്കാനിക് ഓട്ടോ ഇലക്ട്രിക്കൽ ആൻഡ് ഇലക്ട്രോണിക്സ് (MAEE) അല്ലെങ്കിൽ മെക്കാനിക് മോട്ടോർ വെഹിക്കിൾ ട്രേഡിൽ ഐ.ടി.ഐ–എൻ.ടി.സി (National Trade Certificate) നേടിയിരിക്കണം.
3. പ്രവൃത്തി പരിചയം: ബന്ധപ്പെട്ട മേഖലയിൽ പ്രവൃത്തി പരിചയം നിർബന്ധമാണ്.

പ്രായപരിധി (2026 ജൂലൈ 22 പ്രകാരം)

അപേക്ഷകരുടെ പ്രായം 45 വയസ്സിൽ കൂടാൻ പാടില്ല. അതായത്, 1981 ജൂലൈ 23-നോ അതിനുശേഷമോ ജനിച്ചവർക്ക് മാത്രമേ അപേക്ഷിക്കാൻ അർഹതയുള്ളൂ. സർക്കാർ നിയമങ്ങൾ പ്രകാരം പ്രായപരിധിയിൽ ഇളവുകൾ ലഭ്യമാണ്:

• ഒ.ബി.സി (നോൺ-ക്രീമി ലെയർ): 3 വർഷത്തെ പ്രായ ഇളവ്.
• ഭിന്നശേഷിക്കാർ (PwBD) & മുൻസൈനികർ: കേന്ദ്ര സർക്കാർ ചട്ടപ്രകാരം 50 വയസ്സ് വരെ പ്രായ ഇളവ് ലഭിക്കും.

എങ്ങനെ അപേക്ഷിക്കാം?

താല്പര്യമുള്ള ഉദ്യോഗാർത്ഥികൾ ഔദ്യോഗിക വെബ്സൈറ്റ് സന്ദർശിച്ച് ഓൺലൈനായി വേണം അപേക്ഷ സമർപ്പിക്കാൻ. അപേക്ഷിക്കുന്നതിന് മുൻപ് യോഗ്യത, തെരഞ്ഞെടുപ്പ് നടപടികൾ, മറ്റ് നിബന്ധനകൾ എന്നിവ വ്യക്തമായി മനസ്സിലാക്കുന്നതിനായി ഔദ്യോഗിക വിജ്ഞാപനം പരിശോധിക്കുക.

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

3.കൊച്ചിൻ ഷിപ്പ്‌യാർഡിൽ ജോലി നേടാം: സേഫ്റ്റി അസിസ്റ്റന്റ് തസ്തികയിൽ അവസരം

കൊച്ചിൻ ഷിപ്പ്‌യാർഡ് ലിമിറ്റഡ് (CSL). സേഫ്റ്റി അസിസ്റ്റന്റ് തസ്തികയിൽ കരാർ അടിസ്ഥാനത്തിൽ 13 ഒഴിവുകളിലേക്കാണ് ഇപ്പോൾ അപേക്ഷ ക്ഷണിച്ചിരിക്കുന്നത്. മികച്ച ശമ്പളവും പ്രൊഫഷണൽ വളർച്ചയ്ക്കുള്ള അവസരവുമാണ് ഈ നിയമനം വാഗ്ദാനം ചെയ്യുന്നത്. യോഗ്യതയുള്ള ഉദ്യോഗാർഥികൾക്ക് 2026 ജൂലൈ 22 വരെ അപേക്ഷ സമർപ്പിക്കാവുന്നതാണ്.

പ്രധാന യോഗ്യതകൾ

ഈ തസ്തികയിലേക്ക് അപേക്ഷിക്കാൻ ആഗ്രഹിക്കുന്നവർ താഴെ പറയുന്ന യോഗ്യതകൾ നേടിയിരിക്കണം:

• വിദ്യാഭ്യാസ യോഗ്യത: എസ്.എസ്.എൽ.സി (SSLC) പാസായിരിക്കണം. കൂടാതെ, സർക്കാർ അംഗീകൃത സ്ഥാപനത്തിൽ നിന്നോ പൊതുമേഖലാ സ്ഥാപനത്തിൽ നിന്നോ സേഫ്റ്റി അല്ലെങ്കിൽ ഫയർ സുരക്ഷയുമായി ബന്ധപ്പെട്ട ഒരു വർഷത്തെ ഡിപ്ലോമ കോഴ്സ് പൂർത്തിയാക്കിയിരിക്കണം.
• പ്രവൃത്തിപരിചയം: നിർമാണ മേഖല, എഞ്ചിനീയറിങ് കമ്പനികൾ, ഫാക്ടറികൾ അല്ലെങ്കിൽ പൊതുമേഖലാ സ്ഥാപനങ്ങൾ എന്നിവിടങ്ങളിൽ സുരക്ഷാ വിഭാഗത്തിൽ കുറഞ്ഞത് ഒരു വർഷത്തെ പ്രവൃത്തിപരിചയമോ പരിശീലനമോ നിർബന്ധമാണ്.

അപേക്ഷിക്കേണ്ട വിധം

താല്പര്യമുള്ളവർ കൊച്ചിൻ ഷിപ്പ്‌യാർഡിന്റെ ഔദ്യോഗിക വെബ്സൈറ്റ് സന്ദർശിച്ച് വിശദമായ വിജ്ഞാപനം വായിക്കുക. അപേക്ഷകൾ കൃത്യസമയത്ത് തന്നെ ഓൺലൈനായി സമർപ്പിക്കാൻ ശ്രദ്ധിക്കുക. 2026 ജൂലൈ 22 ആണ് അപേക്ഷ സമർപ്പിക്കാനുള്ള അവസാന തീയതി.

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

4.കൊച്ചിൻ ഷിപ്പ്‌യാർഡിൽ സ്കഫോൾഡർ ആകാം; പത്താം ക്ലാസ് യോഗ്യതയുള്ളവർക്ക് സുവർണ്ണാവസരം

കൊച്ചിൻ ഷിപ്പ്‌യാർഡ് ലിമിറ്റഡ് (CSL) സ്കഫോൾഡർ ട്രെയിനി തസ്തികയിലേക്ക് യോഗ്യരായ ഉദ്യോഗാർഥികളിൽ നിന്നും അപേക്ഷ ക്ഷണിച്ചിരിക്കുന്നു. എഴുത്തുപരീക്ഷയുടെ കടമ്പകളില്ലാതെ, ശാരീരികക്ഷമതയുടെ അടിസ്ഥാനത്തിൽ മാത്രം ജോലി നേടാൻ സാധിക്കുന്ന അപൂർവ്വമായ അവസരമാണിത്. മൊത്തം 60 ഒഴിവുകളിലേക്കാണ് നിയമനം നടക്കുന്നത്.

ആർക്കൊക്കെ അപേക്ഷിക്കാം? : പത്താം ക്ലാസ് വിജയിച്ചവർക്ക് ഈ തസ്തികയിലേക്ക് അപേക്ഷിക്കാവുന്നതാണ്. എന്നാൽ ശ്രദ്ധിക്കുക, പന്ത്രണ്ടാം ക്ലാസ് വരെ മാത്രമേ യോഗ്യത പാടുള്ളൂ. ഡിഗ്രി, ഡിപ്ലോമ, ഐ.ടി.ഐ (ITI) തുടങ്ങിയ ഉയർന്ന വിദ്യാഭ്യാസ യോഗ്യതയുള്ളവർക്ക് അപേക്ഷിക്കാൻ അർഹതയില്ല.

പ്രായപരിധിയെ സംബന്ധിച്ചിടത്തോളം, അപേക്ഷകരുടെ പരമാവധി പ്രായം 23 വയസ്സായിരിക്കണം. 2003 ജൂലൈ 23-നോ അതിനുശേഷമോ ജനിച്ചവർക്ക് മാത്രമേ അപേക്ഷ സമർപ്പിക്കാൻ സാധിക്കൂ. സർക്കാർ മാനദണ്ഡങ്ങൾ പ്രകാരം ഒ.ബി.സി (നോൺ-ക്രീമി ലെയർ) വിഭാഗക്കാർക്ക് 3 വർഷവും, എസ്.സി/എസ്.ടി വിഭാഗക്കാർക്ക് 5 വർഷവും പ്രായപരിധിയിൽ ഇളവ് ലഭിക്കും.

തെരഞ്ഞെടുപ്പ് രീതി: ഇതൊരു സമ്പൂർണ്ണ ഫിസിക്കൽ ടെസ്റ്റ് അടിസ്ഥാനത്തിലുള്ള നിയമനമാണ്. ഓൺലൈനായി അപേക്ഷ സമർപ്പിച്ചവരിൽ നിന്ന് സർട്ടിഫിക്കറ്റ് പരിശോധന വഴി യോഗ്യരായവരെ ഷോർട്ട്‌ലിസ്റ്റ് ചെയ്യും. ഇവർക്ക് മാത്രമേ ഫിസിക്കൽ ടെസ്റ്റിൽ പങ്കെടുക്കാൻ അനുവാദമുണ്ടാകൂ. 100 മാർക്കിന്റെ ശാരീരികക്ഷമതാ പരീക്ഷയാകും നടക്കുക. ഇതിൽ വിജയിക്കുന്നവരെ റാങ്ക് പട്ടികയിൽ ഉൾപ്പെടുത്തും. ഒരേ മാർക്ക് ലഭിച്ചാൽ കൂടുതൽ പ്രായമുള്ളവർക്ക് മുൻഗണന നൽകും.

ശാരീരിക യോഗ്യതകൾ (Physical Standards) ഈ ജോലിക്ക് ശാരീരികക്ഷമത വളരെ പ്രധാനമാണ്. ഉദ്യോഗാർഥികൾക്ക് താഴെ പറയുന്ന ശാരീരിക മാനദണ്ഡങ്ങൾ നിർബന്ധമാണ്:

• ഉയരം: കുറഞ്ഞത് 165 സെ.മീ.
• ഭാരം: കുറഞ്ഞത് 55 കിലോഗ്രാം.
• നെഞ്ചളവ്: 75 സെ.മീ. (വികസിപ്പിക്കുമ്പോൾ 80 സെ.മീ. ആയിരിക്കണം).

ഇതിനുപുറമെ, ഭാരമുള്ള വസ്തുക്കൾ ഉയർത്താനും ചുമക്കാനും സാധിക്കണം. ഉയരത്തിൽ ജോലി ചെയ്യാൻ ഭയമില്ലാത്തവരും, ഗോവണികളിലും സ്കാഫോൾഡിംഗിലും സുരക്ഷിതമായി കയറാൻ കഴിയുന്നവരുമായിരിക്കണം. കഠിനമായ ശാരീരിക അധ്വാനം ആവശ്യമുള്ളതിനാൽ മികച്ച ആരോഗ്യസ്ഥിതി അത്യാവശ്യമാണ്. ഇടുങ്ങിയ സ്ഥലങ്ങളിൽ ജോലി ചെയ്യാനുള്ള കഴിവും, മികച്ച കൈ-കണ്ണ് ഏകോപനശേഷിയും (Hand-Eye Coordination) ഉദ്യോഗാർഥിക്ക് ഉണ്ടായിരിക്കണം. സഹപ്രവർത്തകരുമായി ചേർന്ന് ടീമായി പ്രവർത്തിക്കാനുള്ള കഴിവും പ്രധാനമാണ്.

അപേക്ഷിക്കേണ്ട വിധം : താല്പര്യമുള്ളവർ ജൂലൈ 22-ന് മുൻപായി ഔദ്യോഗിക വെബ്സൈറ്റ് വഴി ഓൺലൈനായി അപേക്ഷ സമർപ്പിക്കേണ്ടതാണ്. വിശദമായ വിവരങ്ങൾക്കും വിജ്ഞാപനത്തിനും കൊച്ചിൻ ഷിപ്പ്‌യാർഡിന്റെ ഔദ്യോഗിക വെബ്സൈറ്റ് സന്ദർശിക്കുക.

ശാരീരികക്ഷമത മാനദണ്ഡങ്ങൾ സംബന്ധിച്ച വിജ്ഞാപനം

https://cochinshipyard.in/uploads/career/da791cd150c1344dd85a0d3b9e4094c1.pdf

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

5.പ്ലസ് ടു മുതൽ യോഗ്യതയുള്ളവർക്ക് അവസരം: ഔഷധിയിൽ ജോലി ഒഴിവ്

കേരള സര്‍ക്കാരിന്റെ ഉടമസ്ഥതയിലുള്ള പ്രമുഖ ആയുര്‍വേദ മരുന്ന് നിര്‍മ്മാണ കമ്പനിയായ ‘ഔഷധി’ (ദി ഫാര്‍മസ്യൂട്ടിക്കല്‍ കോര്‍പ്പറേഷന്‍ കേരള ലിമിറ്റഡ്) തങ്ങളുടെ കുട്ടനെല്ലൂരിലുള്ള ഫാക്ടറിയിലേക്ക് മെഷീന്‍ ഓപ്പറേറ്റര്‍മാരെ നിയമിക്കുന്നതിനായി അപേക്ഷ ക്ഷണിച്ചിരിക്കുന്നു. യോഗ്യരായ ഉദ്യോഗാര്‍ത്ഥികള്‍ക്ക് ഔദ്യോഗികമായി അപേക്ഷ സമര്‍പ്പിക്കാനുള്ള അവസരം ജൂലൈ 22, 2026 വരെ ലഭ്യമാണ്.കരാര്‍ അടിസ്ഥാനത്തിലുള്ള താല്‍ക്കാലിക നിയമനമാണ് ഇതിലൂടെ നടപ്പിലാക്കുന്നത്. തെരഞ്ഞെടുക്കപ്പെടുന്ന ഉദ്യോഗാര്‍ത്ഥികള്‍ക്ക് ഒരു വര്‍ഷത്തേക്കാണ് നിയമനം ലഭിക്കുക.

പുരുഷന്മാര്‍ക്ക് മാത്രമാണ് ഈ നിയമനത്തിലേക്ക് അപേക്ഷിക്കാന്‍ അവസരമുള്ളത്. വിദ്യാഭ്യാസ യോഗ്യതയുടെ കാര്യത്തില്‍ വ്യക്തമായ മാനദണ്ഡങ്ങളുണ്ട്. അംഗീകൃത ഐ.ടി.ഐ (ITI) അല്ലെങ്കില്‍ ഐ.ടി.സി (ITC) പാസായവര്‍ക്കോ, അല്ലെങ്കില്‍ പ്ലസ് ടു (Plus Two) യോഗ്യതയുള്ളവര്‍ക്കോ ഈ തസ്തികയിലേക്ക് അപേക്ഷിക്കാവുന്നതാണ്. യോഗ്യതയുള്ളവര്‍ക്ക് അപേക്ഷ സമര്‍പ്പിക്കുന്നതില്‍ തടസ്സമുണ്ടാകില്ല.

പ്രായപരിധിയെ സംബന്ധിച്ചിടത്തോളം, 18 വയസ്സ് മുതല്‍ 41 വയസ്സ് വരെ പ്രായമുള്ളവര്‍ക്കാണ് അപേക്ഷിക്കാന്‍ അര്‍ഹതയുള്ളത്. സര്‍ക്കാര്‍ നിയമങ്ങള്‍ക്ക് അനുസൃതമായി അര്‍ഹരായ ഉദ്യോഗാര്‍ത്ഥികള്‍ക്ക് പ്രായപരിധിയില്‍ ഇളവുകള്‍ അനുവദിക്കുന്നതായിരിക്കും. ഈ മാനദണ്ഡങ്ങള്‍ പാലിക്കുന്നവര്‍ക്ക് ഔഷധിയുടെ കുട്ടനെല്ലൂര്‍ ഫാക്ടറിയില്‍ ജോലി ചെയ്യാന്‍ അപേക്ഷിക്കാം.

ശമ്പള വിവരങ്ങള്‍

തെരഞ്ഞെടുക്കപ്പെടുന്ന ഉദ്യോഗാര്‍ത്ഥികള്‍ക്ക് പ്രതിമാസം 14,700 രൂപ ഏകീകൃത ശമ്പളമായി ലഭിക്കുന്നതാണ്. ഔഷധിയിലെ സേവന കാലാവധി ഒരു വര്‍ഷമാണെങ്കിലും, നിശ്ചിത ശമ്പളവും ആനുകൂല്യങ്ങളും കൃത്യമായി ലഭിക്കുന്നതായിരിക്കും.

അപേക്ഷ സമര്‍പ്പിക്കേണ്ട രീതി

അപേക്ഷകര്‍ക്ക് രണ്ട് വഴികളിലൂടെ അപേക്ഷ സമര്‍പ്പിക്കാനുള്ള സൗകര്യം ഒരുക്കിയിട്ടുണ്ട്. താല്പര്യമുള്ള ഉദ്യോഗാര്‍ത്ഥികള്‍ ഔഷധിയുടെ ഔദ്യോഗിക വെബ്സൈറ്റില്‍ ലഭ്യമായ ഗൂഗിള്‍ ഫോം വഴി ഓണ്‍ലൈനായി അപേക്ഷിക്കാം. കൂടാതെ, തപാല്‍ മാര്‍ഗവും അപേക്ഷ അയക്കാവുന്നതാണ്. വയസ്സ്, ജാതി, വിദ്യാഭ്യാസ യോഗ്യത എന്നിവ തെളിയിക്കുന്ന സര്‍ട്ടിഫിക്കറ്റുകളുടെ പകര്‍പ്പുകള്‍ സഹിതം നിശ്ചിത വിലാസത്തില്‍ അപേക്ഷകള്‍ തപാല്‍ വഴി അയക്കാവുന്നതാണ്. ഈ അപേക്ഷകള്‍ കുട്ടനെല്ലൂരിലുള്ള ഔഷധിയുടെ ഓഫീസില്‍ കൃത്യസമയത്ത് ലഭിക്കത്തക്ക രീതിയില്‍ വേണം അയക്കാന്‍.

അപേക്ഷ അയക്കുമ്പോള്‍ സ്വന്തം മൊബൈല്‍ നമ്പര്‍ കൃത്യമായി രേഖപ്പെടുത്താന്‍ പ്രത്യേകം ശ്രദ്ധിക്കുക. ഉദ്യോഗാര്‍ത്ഥികളുമായി തുടര്‍ ആശയവിനിമയം നടത്തുന്നതിനും ഇന്റര്‍വ്യൂ വിവരങ്ങള്‍ പങ്കുവെക്കുന്നതിനും ഈ നമ്പര്‍ അത്യാവശ്യമാണ്. 2026 ജൂലൈ 22 ആണ് അപേക്ഷ സമര്‍പ്പിക്കാനുള്ള അവസാന തീയതി. അവസാന തീയതിക്ക് ശേഷം ലഭിക്കുന്ന അപേക്ഷകള്‍ പരിഗണിക്കുന്നതല്ല.

കൂടുതല്‍ വിവരങ്ങള്‍ക്കും സംശയ നിവാരണത്തിനുമായി ഔഷധിയുടെ ഔദ്യോഗിക വിജ്ഞാപനം പരിശോധിക്കാവുന്നതാണ്. അര്‍ഹരായ ഉദ്യോഗാര്‍ത്ഥികള്‍ അവസാന തീയതി കാത്തുനില്‍ക്കാതെ നേരത്തെ തന്നെ അപേക്ഷ സമര്‍പ്പിക്കാന്‍ ശ്രദ്ധിക്കുക.

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

6. കേന്ദ്ര പൊതുമേഖലാ സ്ഥാപനത്തിൽ ജോലി; HLL ലൈഫ്‌കെയറിൽ മാനേജർ തസ്തികകളിലേക്ക് നിയമനം

കേന്ദ്ര പൊതുമേഖലാ സ്ഥാപനമായ എച്ച്.എൽ.എൽ ലൈഫ്‌കെയർ ലിമിറ്റഡ് (HLL Lifecare Limited), വിവിധ മാനേജർ തസ്തികകളിലേക്ക് യോഗ്യരായ ഉദ്യോഗാർഥികളിൽ നിന്നും അപേക്ഷ ക്ഷണിക്കുന്നു. ഔദ്യോഗിക വിജ്ഞാപനം പ്രകാരം സീനിയർ ഓപ്പറേഷൻസ് മാനേജർ, ഓപ്പറേഷൻസ് മാനേജർ/അസോസിയേറ്റ് മാനേജർ (റെഗുലേറ്ററി അഫയേഴ്സ് & പ്രൊഡക്ട് രജിസ്ട്രേഷൻ) എന്നീ തസ്തികകളിലാണ് ഒഴിവുകൾ റിപ്പോർട്ട് ചെയ്തിരിക്കുന്നത്. ഓരോ തസ്തികയിലും ഓരോ ഒഴിവ് വീതമാണുള്ളത്. 2026 ജൂലൈ 22 ആണ് അപേക്ഷ സമർപ്പിക്കേണ്ട അവസാന തീയതി.

തസ്തികകളും ഒഴിവുകളും

• സീനിയർ ഓപ്പറേഷൻസ് മാനേജർ (കോർപ്പറേറ്റ് ക്വാളിറ്റി അഷ്വറൻസ്): 1 ഒഴിവ്.
• ഓപ്പറേഷൻസ് മാനേജർ / അസോസിയേറ്റ് മാനേജർ (റെഗുലേറ്ററി അഫയേഴ്സ് & പ്രൊഡക്ട് രജിസ്ട്രേഷൻ): 1 ഒഴിവ്.

വിദ്യാഭ്യാസ യോഗ്യതയും പ്രവൃത്തിപരിചയവും

ഓരോ തസ്തികയ്ക്കും നിർദ്ദിഷ്ട യോഗ്യതകൾ താഴെ പറയുന്നവയാണ്:

1. സീനിയർ ഓപ്പറേഷൻസ് മാനേജർ: ഉദ്യോഗാർഥികൾ മെഡിക്കൽ ലബോറട്ടറി ടെക്നോളജി, മെഡിക്കൽ മൈക്രോബയോളജി, മെഡിക്കൽ ബയോകെമിസ്ട്രി, മെഡിക്കൽ ബയോടെക്നോളജി അല്ലെങ്കിൽ മെഡിക്കൽ ഇമ്മ്യൂണോളജി എന്നിവയിൽ ബിരുദം നേടിയിരിക്കണം. അല്ലെങ്കിൽ, ബയോമെഡിക്കൽ എൻജിനീയറിങ്ങിൽ ബി.ഇ/ബി.ടെക് ബിരുദമുള്ളവർക്കും അപേക്ഷിക്കാം. ഇതിനുപുറമെ, ക്ലിനിക്കൽ ഡയഗ്നോസ്റ്റിക് ലബോറട്ടറികളിലെ ക്വാളിറ്റി അഷ്വറൻസ് അല്ലെങ്കിൽ ക്വാളിറ്റി കണ്ട്രോൾ വിഭാഗത്തിൽ കുറഞ്ഞത് 6 വർഷത്തെ പ്രവൃത്തിപരിചയം നിർബന്ധമാണ്.

2. ഓപ്പറേഷൻസ് മാനേജർ / അസോസിയേറ്റ് മാനേജർ: അപേക്ഷകർ ബി.ഫാം (B.Pharm) ബിരുദമോ അല്ലെങ്കിൽ ബയോമെഡിക്കൽ സയൻസിൽ ബിരുദമോ നേടിയിരിക്കണം. റെഗുലേറ്ററി അഫയേഴ്സ്, പ്രൊഡക്ട് രജിസ്ട്രേഷൻ, ഡോസിയർ തയ്യാറാക്കൽ തുടങ്ങിയ മേഖലകളിൽ മുൻപരിചയം ഉള്ളവർക്ക് മുൻഗണന ലഭിക്കും.

പ്രായപരിധി

2026 ജൂലൈ 1 അടിസ്ഥാനമാക്കിയാണ് പ്രായപരിധി കണക്കാക്കുന്നത്:

• സീനിയർ ഓപ്പറേഷൻസ് മാനേജർ: പരമാവധി 45 വയസ്.
• ഓപ്പറേഷൻസ് മാനേജർ: പരമാവധി 40 വയസ്.
• അസോസിയേറ്റ് മാനേജർ: പരമാവധി 37 വയസ്.

അപേക്ഷ സമർപ്പിക്കേണ്ട രീതി

താൽപര്യമുള്ള ഉദ്യോഗാർഥികൾ ഗൂഗിൾ ഫോം (Google Form) വഴിയാണ് ഓൺലൈനായി അപേക്ഷ സമർപ്പിക്കേണ്ടത്. നിർദ്ദിഷ്ട അപേക്ഷാ ഫോം കൃത്യമായി പൂരിപ്പിച്ച ശേഷം ആവശ്യമായ രേഖകൾ സഹിതം ഓൺലൈനായി അപ്‌ലോഡ് ചെയ്യേണ്ടതാണ്. യോഗ്യതയും പ്രവൃത്തിപരിചയവും അടിസ്ഥാനമാക്കി ഷോർട്ട്‌ലിസ്റ്റ് ചെയ്യുന്ന ഉദ്യോഗാർഥികളെ അഭിമുഖത്തിന് (Interview) വിളിക്കും. അഭിമുഖത്തിന്റെ അടിസ്ഥാനത്തിലായിരിക്കും അന്തിമ തെരഞ്ഞെടുപ്പ്.

കൂടുതൽ വിവരങ്ങൾക്കും അപേക്ഷാ ലിങ്കുകൾക്കുമായി എച്ച്.എൽ.എൽ ലൈഫ്‌കെയറിന്റെ ഔദ്യോഗിക വെബ്സൈറ്റ് സന്ദർശിക്കുക. അവസാന തീയതിക്ക് മുൻപ് തന്നെ അപേക്ഷകൾ സമർപ്പിക്കാൻ ഉദ്യോഗാർഥികൾ ശ്രദ്ധിക്കണം.

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

സീനിയർ ഓപ്പറേഷൻസ് മാനേജർ

മാനേജർ

ഏറ്റവും പുതിയ തൊഴിൽ അവസരങ്ങൾ അതിവേഗം അറിയാൻ വാട്സ്ആപ്പ് ചാനലിൽ ഇപ്പോൾ തന്നെ അംഗമാകൂ: https://whatsapp.com/channel/0029VbDOmz3DzgT83lMzu01s