ഐ.ടി.ഐ ഉണ്ടോ? ബി.ഇ.എം.എല്ലിൽ 362 ഒഴിവുകൾ

പ്രതിരോധം, റെയിൽവേ, മെട്രോ, ഖനനം, നിർമാണം എന്നീ മേഖലകളിൽ ലോകോത്തര നിലവാരമുള്ള എൻജിനീയറിങ് യന്ത്രങ്ങൾ നിർമിക്കുന്ന ഭാരത സർക്കാരിന്റെ പ്രമുഖ പൊതുമേഖലാ സ്ഥാപനമായ ഭാരത് എർത്ത് മൂവേർസ് ലിമിറ്റഡിൽ (BEML) തൊഴിലവസരം. വിവിധ ട്രേഡുകളിലായി 362 ഓപ്പറേറ്റർ തസ്തികകളിലേക്കാണ് ഇപ്പോൾ അപേക്ഷ ക്ഷണിച്ചിരിക്കുന്നത്. മികച്ച ശമ്പളവും കേന്ദ്ര സർക്കാർ ആനുകൂല്യങ്ങളും ഉറപ്പുനൽകുന്ന ഈ നിയമനം, സാങ്കേതിക മേഖലയിൽ കരിയർ കെട്ടിപ്പടുക്കാൻ ആഗ്രഹിക്കുന്ന ഐ.ടി.ഐ (ITI) പാസ്സായ ഉദ്യോഗാർഥികൾക്ക് ലഭിക്കുന്ന സുവർണ്ണാവസരമാണ്.

തസ്തികകളും ഒഴിവുകളും

ആകെ 362 ഒഴിവുകളാണുള്ളത്. വിവിധ ട്രേഡുകളിലായി താഴെ പറയുന്ന രീതിയിലാണ് ഒഴിവുകൾ ക്രമീകരിച്ചിരിക്കുന്നത്:

• ഫിറ്റർ: 127 ഒഴിവുകൾ
• ടർണർ: 93 ഒഴിവുകൾ
• ഇലക്ട്രീഷ്യൻ: 58 ഒഴിവുകൾ
• വെൽഡർ: 44 ഒഴിവുകൾ
• മെഷീനിസ്റ്റ്: 40 ഒഴിവുകൾ

(ഓരോ വിഭാഗത്തിലെയും സംവരണം സംബന്ധിച്ച വിശദാംശങ്ങൾ ബി.ഇ.എം.എല്ലിന്റെ ഔദ്യോഗിക വെബ്സൈറ്റിൽ ലഭ്യമാണ്.)

യോഗ്യതയും പ്രായപരിധിയും

ബന്ധപ്പെട്ട ട്രേഡുകളിൽ നാഷണൽ ട്രേഡ് സർട്ടിഫിക്കറ്റ് (ITI) പാസ്സായവർക്ക് അപേക്ഷിക്കാം. പരീക്ഷയിൽ കുറഞ്ഞത് 60% മാർക്ക് ഉണ്ടായിരിക്കണം. പട്ടികജാതി/പട്ടികവർഗ്ഗ വിഭാഗത്തിലുള്ളവർക്ക് 55% മാർക്ക് മതിയാകും. കൂടാതെ, അതാത് ട്രേഡുകളിൽ നാഷണൽ അപ്രന്റിസ്ഷിപ്പ് പൂർത്തിയാക്കിയ സർട്ടിഫിക്കറ്റും നിർബന്ധമാണ്.

2026 ജൂലൈ 10 അടിസ്ഥാനമാക്കി ഉദ്യോഗാർഥികൾക്ക് 29 വയസ്സിൽ താഴെയായിരിക്കണം പ്രായം. സർക്കാർ നിയമപ്രകാരം പിന്നാക്ക, പട്ടികജാതി/വർഗ്ഗ, ഭിന്നശേഷി വിഭാഗക്കാർക്ക് യഥാക്രമം 3, 5, 10 വർഷത്തെ പ്രായപരിധി ഇളവ് ലഭിക്കും.

ശമ്പളവും മറ്റ് ആനുകൂല്യങ്ങളും

നാല് വർഷത്തേക്കുള്ള കരാർ അടിസ്ഥാനത്തിലാണ് നിയമനം. അടിസ്ഥാന ശമ്പളമായി 16,900 രൂപ ലഭിക്കും. ഇതിനു പുറമെ കേന്ദ്ര സർക്കാർ നിരക്കിലുള്ള ഡി.എ (DA), എച്ച്.ആർ.എ (HRA) തുടങ്ങിയ ആനുകൂല്യങ്ങളും ലഭിക്കും. കൂടാതെ, പ്രതിമാസം 1500 രൂപ മെഡിക്കൽ അലവൻസും വർഷം തോറും 3% വാർഷിക ഇൻക്രിമെന്റും ലഭിക്കും. പൊതുമേഖലാ സ്ഥാപനത്തിൽ ലഭിക്കുന്ന ഈ തൊഴിൽ പരിചയം ഭാവിയിൽ ഉദ്യോഗാർഥികൾക്ക് മികച്ച തൊഴിൽ സാധ്യതകളാണ് തുറന്നുനൽകുന്നത്.

തിരഞ്ഞെടുപ്പ് രീതി

എഴുത്ത് പരീക്ഷയുടെ അടിസ്ഥാനത്തിലാണ് തിരഞ്ഞെടുപ്പ് നടക്കുന്നത്. മൾട്ടിപ്പിൾ ചോയ്സ് മാതൃകയിലുള്ള പരീക്ഷയിൽ 100 ചോദ്യങ്ങളുണ്ടാകും.

• ജനറൽ അവയർനസ്സ്: 20 ചോദ്യങ്ങൾ
• ഇംഗ്ലീഷ് ആൻഡ് റീസണിങ്ങ്: 20 ചോദ്യങ്ങൾ
• ട്രേഡ് വിഷയം: 60 ചോദ്യങ്ങൾ

രണ്ട് മണിക്കൂർ ദൈർഘ്യമുള്ള പരീക്ഷയ്ക്ക് നെഗറ്റീവ് മാർക്കിങ് ഉണ്ടായിരിക്കുന്നതല്ല. പരീക്ഷയിൽ യോഗ്യത നേടാൻ ജനറൽ വിഭാഗക്കാർ 45% മാർക്കും, പട്ടിക/ഭിന്നശേഷി വിഭാഗക്കാർ 40% മാർക്കും നേടിയിരിക്കണം. ഇന്റർവ്യൂവിന് ക്ഷണിക്കപ്പെടുന്ന ഉദ്യോഗാർഥികൾക്ക് രണ്ടാം ക്ലാസ് സ്ലീപ്പർ ട്രെയിൻ യാത്ര നിരക്ക് ലഭിക്കും.

അപേക്ഷിക്കേണ്ട വിധം

താല്പര്യമുള്ള ഉദ്യോഗാർഥികൾ ജൂലൈ 10-നകം ഓൺലൈനായി അപേക്ഷ സമർപ്പിക്കണം. അപേക്ഷ ഫീസായി 200 രൂപ അടയ്ക്കേണ്ടതുണ്ട് (പട്ടിക/ഭിന്നശേഷി വിഭാഗക്കാർക്ക് ഫീസില്ല).

വെബ്സൈറ്റ്: bemlindia.in

സംശയങ്ങൾക്ക്: recruitment@bemlltd.in

സാങ്കേതിക മേഖലയിൽ മികച്ചൊരു ഭാവി സ്വപ്നം കാണുന്നവർ ഈ അവസരം പാഴാക്കരുത്. കൃത്യസമയത്ത് തന്നെ അപേക്ഷ സമർപ്പിക്കാൻ ശ്രദ്ധിക്കുക.

നോട്ടിഫിക്കേഷൻ കിട്ടാൻ ക്ലിക്ക് ചെയ്യൂ

ഏറ്റവും പുതിയ തൊഴിൽ അവസരങ്ങൾ അതിവേഗം അറിയാൻ വാട്സ്ആപ്പ് ചാനലിൽ ഇപ്പോൾ തന്നെ അംഗമാകൂ: https://whatsapp.com/channel/0029VbDOmz3DzgT83lMzu01s